انصار: ( د غویی14مه)، د خبريالانو د خونديتوب کمېټه وايي، په تېر يو کال کې په رسنيو کې د ښځينه خبريالانو حضور ۱۷ سلنه او د نارينه خبريالانو لس سلنه زيات شوی دی.
د خبريالانو خونديتوب کمېټې د خبريالانو د قضایاوو د څيړنې مسوول جميل وقار د مطبوعاتو د ازادۍ د نړيوالې ورځې په مناسبت جوړو شويو مراسمو ته په خپلو خبرو کې دغه شمېرې له رسنيو سره شريکې کړې او دغه راز يې اقتصادي ستونزې، اطلاعاتو ته نه لاسرسی او ځینې محدوديتونه يې د خبريالانو پر وړاندې عمده ستونزې وبللې.
په دې غونډه کې د خبريالانو د خونديتوب کمېټې مشر عبدالقديم وياړ خبريالانو ته د مسلکي روزنې پر ورکړې ټينګار وکړ او ويې ويل چې ډېر شمېر نوي خبريالان د خبريالۍ ډګر ته راوتلي دي.
نوموړي زياته کړه د نويو خبريالانو د روزنې لپاره دې ورکشاپونه او سمينارونه جوړ شي.
په دې مراسمو کې د ښځينه خبريالانو په استازيتوب فرحناز خبرې وکړې او وې ويل، سږکال د مطبوعاتو د ازادۍ نړيواله ورځ داسې مهال نمانځل کيږي چې د هېواد ځينو برخو کې له رسنیو د ښځو د غږ پر خپرولو بنديز لګېدلی دی.
فرحناز څرګنده کړه، « موږ د ګټونکو په توګه پر مخ روان يو، زموږ حضور حتمي دی.»
نوموړې په رسنيو کې د ښځينه خبريالانو د کار پر دوام ټينګار وکړ او له مسوولينو يې وغوښتل چې رسنيو کې د ښځو پر کار بنديز ونه لګوي.
د طلوع نيوز مشر ذبیح سادات بيا زياته کړه چې پر رسنيو محدوديتونه څه ناڅه کم شوي خو په خبره يې د قناعت وړ نه دي.
نوموړي خبرداری ورکړ که د رسنيو اقتصادي ستونزې هوارې نه شي، ښایي ځينې رسنۍ سقوط شي.
په دې غونډه کې د کورنيو چارو وزارت وياند عبدالمتين قانع له رسنیو سره د اطلاعاتو پر شريکولو ټينګار وکړ.
هغه زياته کړه د رسنيو ازادي بايد د اسلام او ملي ګټو له اړخه تعريف شي.
د مې درېیمه د مطبوعاتو د ازادۍ نړیواله ورځ ده په ۱۹۹۳ ميلادي کال کې د ملګرو ملتونو لخوا په عمومي اسامبلۍ کې تصويب شوې چې له مخې يې، د رسنیو د ازادۍ پر بنسټیزو اصولو، له رسنيو د حکومتونو ملاتړ، د رسنیو د ازادۍ عمومي وضعیت څېړنې او د هغو خبریالانو ياد تازه کولو باندې ټينګار شوی چې په رسنيز کار کې يې ژوند له لاسه ورکړی دی.
URL تعقيب: https://www.ansarpress.com/pashto/31401
د فرشتې کوهستاني او د هغه د ورور مړي خاورو ته وسپار شول